د خبرو موخه دې پارلمان د واک اصلي سرچینه ګرځول او صوبایي خپلواکي منل وي، محمود خان اڅکزی

اسلام‌آباد/کوټه(وېب نیوز)د قومي اسمبلۍ اپوزېسیون مشر او د تحریک تحفظ آئین پاکستان مشر محمود خان اڅکزي ویلي چې خبرې اترې هغه وخت ګټورې کېدای شي چې منتخب پارلمان د واک اصلي سرچینه وبلل شي، د هېواد ټولې پرېکړې په پارلمان کې وشي او صوبې پر خپلو سرچینو بشپړ واک ولري. هغه د قومي اسمبلۍ په وینا کې د صوبایي خپلواکۍ، د اساسي قانون د برلاسۍ او د ولسواکو ادارو د درناوي غوښتنه وکړه او پر روان سیاسي او امنیتي وضعیت یې سختې نیوکې وکړې. اڅکزي وویل چې پاکستان یو رضاکارانه فدراسیون دی او د ټولو قومونو د حقونو او د صوبو د خپلواکۍ درناوی اړین دی. هغه د ترهګرۍ، د سیاسي مخالفینو پر ضد د اقداماتو او د ادعا شویو غیرقانوني کړنو په اړه پوښتنې راپورته کړې او د سیاسي ستونزو د حل لپاره یې پر ولسواکو لارو ټینګار وکړ.