مولانا فضل الرحمن د ترهګرۍ په اړه د پارلمان د تړلې غونډې غوښتنه وکړه

لاهور (وېب نیوز) د جمعیت علمای اسلام (ف) مشر مولانا فضل الرحمن ویلي، دی د ترهګرۍ پر وړاندې د ملي پالیسۍ خبره کوي، نو د دوی د قربانیو ملنډې دې نه وهل کېږي. هغه وویل، له دومره قربانیو وروسته که څوک پر خلکو زور او جبر کوي، دی به ورسره مخالفت کوي. مولانا فضل الرحمن په لاهور کې له رسنیو سره د خبرو پر مهال غوښتنه وکړه چې د ترهګرۍ په اړه د ولس د باور ترلاسه کولو لپاره دې د پارلمان تړلې غونډه راوبلل شي او د دې مهمې ملي ستونزې لپاره دې ګډه او متفقه پالیسي جوړه شي. د هغه په وینا، د ولس د باور ترلاسه کولو اغېزمنه لاره پارلمان دی؛ نو هېواد د محرومۍ پر لور د بېولو څه اړتیا ده؟ نوموړي زیاته کړه چې ځینې کسان د خپل سیاسي قد لوړولو لپاره پر ده نیوکې کوي. مولانا فضل الرحمن د ریاض هوايي ډګر برید هم په کلکه وغنده او ویې ویل چې سعودي عربستان د پاکستان دوست هېواد دی او غواړي د دواړو هېوادونو اړیکې لا پیاوړې شي.