د ریاض پر هوايي ډګر بریدونو کې ۱۷ پاکستانیان ټپیان، یو تن وژل شوی

ریاض (وېب نیوز) د سعودي عربستان د پلازمېنې ریاض پر کینګ خالد نړیوال هوايي ډګر د اکتوبر پر ۱۰مه او ۱۱مه نېټه په دوو بریدونو کې ۱۷ پاکستانیان ټپیان شوي، چې پنځه ښځې هم پکې شاملې دي، په داسې حال کې چې په دویم برید کې یو پاکستانی وګړی وژل شوی دی. د سفارتي سرچینو په وینا، له ټپیانو څخه ۱۵ تنه تر درملنې وروسته له روغتونونو رخصت شوي، خو د دوو پاکستانیانو درملنه لا هم د ریاض په روغتون کې روانه ده. د سرچینو په خبره، په لومړي برید کې ټولټال ۱۲ کسان وژل شوي او ۳۰۹ نور ټپیان شوي وو. پاکستاني سفارتي چارواکي د اغېزمنو وګړو روغتیايي وضعیت څاري.