د جرګو له لارې به د ترهګرۍ، ناامنۍ، بدمدیریت او حکومتي پراکسیانو پر ضد ګډ احتجاج کوو، نواب ایاز خان جوګیزي

کوټه (پ ر): د پښتونخوا ملي عوامي ګوند مشرانو ویلي چې په پښتونخوا وطن کې د روانې ناامنۍ اساسي موخه د معدني زېرمو نیول دي او د پښتونخوا د منتخبې استازې حکومت ختمول یې هم د همدې پالیسۍ برخه بللې ده. دوی اعلان کړی چې جرګې به په ولسوالیو کې تنظیموي او په ټول پښتونخوا وطن کې به د ترهګرۍ، ناامنۍ، بدمدیریت او د حکومت تر ملاتړ لاندې پراکسیانو پر ضد د ګډ احتجاج لپاره لاره هواروي. دغه څرګندونې د ګوند مرکزي مشرانو نواب محمد ایاز خان جوګیزي، عبدالرحیم زیارتوال، ډاکټر حامد خان اڅکزي او نورو د کوټې ساینس کالج د پښتونخوا سټوډنټس ارګنایزېشن د سیمه‌ییز یونټ له خوا د نویو زده‌کوونکو په ویاړ جوړې شوې هرکلي غونډې او د غړیتوب پروګرام ته د وینا پر مهال وکړې. په غونډه کې له ۲۰۰ څخه زیاتو زده‌کوونکو په سازمان کې غړیتوب واخیست. ویناوالو وویل چې د معدني زېرمو اصلي مالکان د اړوندو سیمو ولسونه او قومونه دي، نو د هغوی د حقونو انکار او د صوبایي خپلواکۍ تر پښو لاندې کول د منلو وړ نه دي. هغوی پر ۲۶مې او ۲۷مې اساسي قانوني ترمیمونو نیوکه وکړه او ادعا یې وکړه چې د قضایه قوې خپلواکي، د رسنیو ازادي او بنسټیز بشري حقونه اغېزمن شوي دي. مشرانو د پښتو اکېډمۍ او نورو ملي اکېډمیو په اړه پر وړاندیز شوي قانون هم اندېښنه څرګنده کړه او ویې ویل چې د اکېډمیو چارې حکومتي کارکوونکو ته سپارل د هغوی ژبنۍ، ادبي، تاریخي او کلتوري خپلواکي زیانمنولای شي. د دوی په وینا، اکېډمۍ د قومونو د علمي، ادبي او کلتوري میراثونو د ساتنې او څېړنې مهم مسؤلیت لري. ویناوالو وویل چې په صوبه کې د زده‌کړو کچه له ۵۰ سلنې ټیټه ده او شاوخوا له ۲۰ څخه تر ۲۵ لکو ماشومان له ښوونځیو بهر دي. هغوی په مورنۍ ژبه د زده‌کړو پر پراختیا، په تعلیمي ادارو کې د ښوونکو د کمښت پر ختمولو او د ښوونې او روزنې د معیار پر لوړولو ټینګار وکړ. د غونډې په پای کې نویو شامل شوو زده‌کوونکو ته مبارکي ورکړل شوه او وویل شول چې سازمان به د ځوان نسل د پوهې، ملي شعور او ډیموکراتیکو ارزښتونو د پیاوړتیا لپاره خپلې مبارزې ته دوام ورکوي.