په مستونګ کې د چاودېدونکو توکو ډک موټر په وسیله د ترهګرۍ لویه هڅه شنډه شوه، درې ترهګر ووژل شول، دوه ملکي وګړي شهیدان شول

کوټه (وېب نیوز) د بلوچستان اعلیٰ وزیر میر سرفراز بګټي په مستونګ کې د 25-N ملي لویې لارې د کنډوا پوستې ترڅنګ د چاودېدونکو توکو ډک موټر په وسیله د ترهګرۍ د یوې لویې هڅې د ناکامولو له امله امنیتي ځواکونو ته د درناوي او ستاینې مراتب وړاندې کړي دي. د اعلیٰ وزیر په وینا، د امنیتي ځواکونو د پر وخت او اغېزمن ځوابي اقدام په پایله کې درې ترهګر وژل شوي، خو په دې پېښه کې دوه ملکي وګړي شهیدان او ګڼ نور ټپیان شوي دي. میر سرفراز بګټي د شهیدانو له کورنیو سره خواخوږي څرګنده کړې او د ټپیانو د ژر روغتیا لپاره یې دعا کړې ده. د اعلیٰ وزیر د اطلاعاتو او سیاسي چارو مرستیال شاهد رند ویلي، چې د چاودنې له امله نږدې کورونو او یوه جومات ته هم زیان رسېدلی او ټپیان د درملنې لپاره اړوندو روغتونونو ته لېږدول شوي دي. میر سرفراز بګټي ویلي، چې د بلوچستان د سولې او امنیت د خرابولو هڅه کوونکي عناصر به د ترهګرۍ تر بشپړ له منځه وړلو پورې له عملیاتو سره مخ وي او د خلکو د سر او مال ساتنه د حکومت لومړیتوب دی.# د بلوچستان معدني زېرمې او د پانګونې فرصتونه نړیوالو پانګه‌والو ته ورپېژندل کېږي: سرفراز بګټياسلام آباد، کوټه (وېب نیوز): د پاکستان د منرالونو د پانګونې فورم ۲۰۲۶ په مناسبت د بلوچستان اعلیٰ وزیر میر سرفراز بګټي د کانونو او منرالونو د څانګې له غرفې څخه د لومړي وزیر مرستیال او د بهرنیو چارو وزیر محمد اسحاق ډار ته د بلوچستان د معدني زېرمو، په معدني برخه کې د روانو اقداماتو او د پانګونې د شته فرصتونو په اړه معلومات ورکړل. په دې موقع د خیبر پښتونخوا ګورنر فیصل کریم کنډي، د پنجاب اعلیٰ وزیرې مریم نواز شریف، د سند اعلیٰ وزیر سید مراد علي شاه، وفاقي وزیران او نور لوړپوړي چارواکي هم موجود وو. د بلوچستان د پانګونې او سوداګرۍ بورډ مرستیال مشر بلال خان کاکړ او د کانونو سېکرټري سیدال خان لوني هم له اعلیٰ وزیر سره ملګري وو. میر سرفراز بګټي د بلوچستان د طبیعي زېرمو او د معدني برخې د پانګونې وړتیاوو په اړه خبرې وکړې او دغه فورم یې د ملي او نړیوالو پانګه‌والو پر وړاندې د بلوچستان د معدني سرچینو د ورپېژندلو لپاره یو مهم فرصت وباله.