زیارت کې د مانګي ډیم پېښې پر ضد د ټولو ګوندونو ستره سوله ییزه لاریون، زرګونو کسانو ګډون وکړ

زیارت (ویب نیوز) د ټولو سیاسي ګوندونو په ګډه بلنه د مانګي ډیم د خونړۍ پېښې پر ضد یوه پراخه سوله ییزه احتجاجي لاریون ترسره شو چې پکې زرګونو ماشومانو، ښځو، مشرانو، ځوانانو، سیاسي او ټولنیزو شخصیتونو، سوداګرو او عامو خلکو ګډون وکړ. لاریونوالو د ترهګرۍ پر ضد او د تلپاتې سولې په ملاتړ شعارونه ورکړل او د پېښې شهیدو پولیسو ته یې د عقیدت پیرزوینې وړاندې کړې. د ویناوالو په خبره، د مانګي ډیم پېښه یوه زړه بوږنوونکې فاجعه ده او حکومت باید ژر تر ژره د دې پېښې عاملین د قانون منګولو ته وسپاري، د شهیدانو کورنیو ته انصاف ورکړي او په زیارت او ټول بلوچستان کې د امنیت د ټینګښت لپاره عملي ګامونه پورته کړي.