په پنجګور کې د ناامنۍ پر ضد د آل پارټیز احتجاجي لاریون، د زیارت پېښه وغندل شوه

پنجګور (وېب نیوز) د بلوچستان د نورو سیمو په څېر په پنجګور کې هم د آل پارټیز په غوښتنه د بلوچستان نیشنل پارټۍ (بي اېن پي) او نیشنل پارټۍ له خوا د ناامنۍ، د زیارت پېښې او د پولیسو د سرتېرو د وژنو پر ضد احتجاجي لاریون ترسره شو. لاریون د ښار له بېلابېلو لارو د بسم الله چوک ته ورسېد او هلته یې د احتجاجي غونډې بڼه خپله کړه. ویناوالو میر نظیر احمد بلوچ، حاجي عبدالغفار شمبېزي او کامرېډ مجیب احمد وویل چې په بلوچستان کې امنیتي وضعیت خورا خراب شوی، ولس او پولیس دواړه خوندي نه دي او حکومت د ستونزو په حل کې پاتې راغلی دی. هغوی غوښتنه وکړه چې د خلکو او امنیتي ځواکونو د سر او مال د ساتنې لپاره دې بېړني او عملي اقدامات وشي او په صوبه کې دې د تلپاتې سولې د ټینګښت لپاره جدي ګامونه پورته کړل شي.