هرنای کې د څلورو امنيتي ځواکونو مړي موندل شوي، پلټنې روانې دي

کوټه (ويب نيوز) د بلوچستان د هرنايي ولسوالۍ د شعبان سيمې څخه د څلورو امنيتي ځواکونو مړي ترلاسه شوي دي. په وژل شويو کې د هوايي ډګر د امنيتي ځواک انسپکټر زبير احمد شاهوانی، د سي ټي ډي پخوانی اهلکار سيد خليل الرحمن، د پاکستان پوځ متقاعد حوالدار محمد صادق او د پوليسو سپاهي فريد احمد شامل دي. حکومتي سرچينو ويلي چې ياد کسان په بېلابېلو وختونو کې له کوټې او زيارت څخه تښتول شوي وو، او وروسته يې مړي د شعبان له سيمې ترلاسه شول. مړي د پېژندنې او قانوني چارو تر بشپړېدو وروسته خپلو کورنيو ته وسپارل شول، او امنيتي ادارو د پېښې پلټنې پيل کړې دي. چارواکي وايي چې د شعبان او شاوخوا سيمو کې د وسلوالو پر ضد عمليات دوام لري، خو تر اوسه هېڅ ډلې د دغې پېښې مسؤوليت نه دی منلی.