د ترهګرۍ د عروج پر مهال په بلوچستان پولیسو کې ۵,۱۴۷ څوکۍ تشې، مسؤل څوک دی؟

کوټه (ویب نیوز) په بلوچستان کې د ترهګرۍ، غلاوو، د تاوان لپاره د تښتونو او نورو جرمونو د زیاتېدو تر څنګ د بلوچستان پولیس له سخت بشري کمښت سره مخ دي. د پولیسو د سرچینو له مخې، دا مهال په محکمه کې ټولټال ۵,۱۴۷ بستونه تش دي، چې له امله یې پر موجودو پولیسو د کار فشار زیات شوی او د امن او نظم د ساتنې چارې اغېزمنې شوې دي. د معلوماتو له مخې، په تشو بستونو کې د ایس پي، ډي ډي، ډي ایس پي، اسسټنټ ډایرکټر، انسپکټر، پراسیکیوټر انسپکټر، سب انسپکټر، دفتر سوپرنټنډنټ، اسسټنټ، سینیر او جونییر کلرک، اسسټنټ سپروایزر، اردلي، اسسټنټ سب انسپکټر، هیډ کانسټیبل او کانسټیبل پوستونه شامل دي. پولیس وایي، د دې کمښت له امله د پولیسو په مرکزونو، ټرافیک، پلټنو، عملیاتو او اداري برخو کې پر کارکوونکو اضافي مسؤلیتونه ور اچول شوي، چې د خدمتونو کیفیت اغېزمنوي. بلخوا، پولیسو د تېر کال راهیسې د ځنډېدلو ترفیعاتو په اړه هم اندېښنه څرګنده کړې او ویلي یې دي چې ډېر مستحق افسران لا هم د پرمختګ په تمه دي. دوی له د بلوچستان د پولیسو له مشر محمد طاهر او د صوبې له وزیراعلیٰ میر سرفراز بګټي غوښتنه کړې چې پر تشو بستونو دې ژر تر ژره ګومارنې وشي، ځنډېدلي ترفیعات دې بشپړ شي او د پولیسو د بشري ځواک ستونزه دې په بېړني ډول هواره شي.