د بلوچستان حکومت د پوليسو د شهيدانو د مالي مرستو د زياتولو پرېکړه

کوټه (ويب نيوز) د بلوچستان حکومت د پوليسو د شهيدانو لپاره د مالي مرستو د زياتولو پرېکړه کړې ده. د وزيراعلی سلاکار شاهد رند ويلي، وزيراعلی مير سرفراز بګټي د منظورۍ لپاره اړونده لنډيز (سمري) غوښتی او د پوليسو د شهيدانو د مالي مرستو پر پکېج د بيا کتنې پرېکړه شوې ده. د وړانديز له مخې به د بي اېس ۱ څخه تر ۱۶ درجې پورې د پوليسو د شهيدانو نغدي معاوضه له يو کروړ روپيو څخه يو کروړ او ۲۵ لکه روپيو ته لوړه کړل شي. همدارنګه د کانسټېبل او هيډ کانسټېبل لپاره د پلاټ يا ځمکې پر ځای نغدي ورکړه له ۱۱ لکو څخه ۲۵ لکو روپيو ته د زياتولو سپارښتنه هم شوې ده. چارواکي وايي، د دې اقدام موخه د شهيدانو له کورنيو سره لا زياته مالي مرسته او د هغوی د قربانيو درناوی دی.