په مالي کې پر پوځي کاروان برید، ۵۰ سرتېري وژل شوي

کوټه (ویب نیوز): د لوېدیځې افریقا په مالي هېواد کې پر یوه پوځي کاروان د برید له امله لږ تر لږه ۵۰ سرتېري وژل شوي او ګڼ نور ټپیان دي. د نړیوالو رسنیو د راپورونو له مخې، برید د هېواد په شمالي او مرکزي سیمو کې د کمین په بڼه ترسره شوی، چې پکې بریدګرو د اتومات وسلو او چاودېدونکو توکو په وسیله پوځي موټرې په نښه کړې. د مالي پوځ د برید پخلی کړی او ویلي یې دي چې سیمې ته اضافي ځواکونه استول شوي، د بریدګرو د نیولو لپاره عملیات روان دي او د پېښې د څېړنې لړۍ هم پیل شوې ده. تر اوسه هېڅ ډلې د برید مسؤلیت نه دی منلی، خو چارواکي د بېلابېلو وسله والو ډلو د احتمالي لاس لرلو په اړه پلټنې کوي.