ډاکټر عبدالمالک بلوچ په حکومت کې ډېری کسان اصلي جيالې او مسلم ليګيان نه دي، د بلوچستان خلکو ته دې خپل اساسي او آئيني حقونه ورکړل شي

کوټه(ویب نیوز): د بلوچستان پخواني وزيراعلی او د نېشنل پارټۍ مشر ډاکټر عبدالمالک بلوچ ويلي، د بلوچستان په اوسني حکومت کې شامل ډېری کسان نه د پاکستان پيپلز ګوند ريښتيني جيالې دي او نه هم د مسلم ليګ (ن) پخواني او نظرياتي غړي، بلکې د بېلابېلو سياسي ګوندونو کسان د وفاداريو له بدلولو وروسته واک ته رسېدلي دي. نوموړي له يوه خصوصي ټلوېزيون سره په ځانګړې مرکه کې وويل، اسلام‌اباد بايد د بلوچستان په اړه خپله تګلاره بدله کړي او د صوبې خلکو ته د رايې ورکولو اساسي حق، د خپلواکۍ حق او پر خپلو طبيعي زېرمو د واک اختيار ورکړي، ګنې ستونزې به نورې هم زياتې شي. هغه ټينګار وکړ چې هېواد بايد د ۱۹۷۳م اساسي قانون، اتلسم بدلون او د اين اېف سي اېوارډ له مخې اداره شي. ډاکټر عبدالمالک وويل، د بارډرونو تړل کېدو له امله د بلوچستان د شاوخوا ۲۰ تر ۲۵ لکو کسانو د روزګار سرچينې له منځه تللې او زرګونه کورنۍ له سختو اقتصادي ستونزو سره مخ دي. نوموړي زياته کړه چې د بلوچستان ستونزې د زور، سياسي انجنيرۍ او مقدمو له لارې نه، بلکې د سياسي خبرو، ولسواکۍ، د ولس د حقيقي مينډيټ درناوي او د صوبې د آئيني حقونو په ورکولو حل کېدای شي. هغه دا هم وويل چې په هېواد کې ولسواکي ورځ تر بلې کمزورې کېږي او ټولې سياسي ډلې بايد د شخصي ګټو پر ځای د ولس ستونزو ته لومړيتوب ورکړي.