د هېواد له بحرانونو د ژغورنې او ثبات ضمانت یوازې د اسلامي نظام په پلي کېدو کې دی، جمعیت علماء اسلام کوټه

کوټه(ویب نیوز) د جمعیت علماء اسلام کوټې ضلعې امیر شیخ الحدیث مولانا عبدالرحمن رفیق، عمومي منشي حاجي عین الله شمس، مشر مرستیال امیر مولانا خورشید احمد، د مالیې منشي حاجي صالح محمد، مفتي رضا خان، حاجي ظفرالله کاکړ، میر سرفراز شاهواني، میر حشمت لهړي، سیټ اجمل بازي، سالار مولوي علي جان، مولانا سید سعدالله آغا او مولوي نقیب الله ملاخېل ویلي چې هېواد ته د ورپېښو سیاسي او اقتصادي بحرانونو څخه د ژغورنې او د حقیقي ثبات ضمانت یوازې د اسلامي نظام په پلي کېدو کې دی. هغوی وویل چې د پاکستان له جوړېدو څخه ۷۹ کاله تېر شوي، خو تر اوسه داسې مشرتابه او د حکومتولۍ دوام نه دی رامنځته شوی چې اسلامي ارزښتونه، د ولس هوساینه او ملي خپلواکي خپلې لومړنۍ موخې وګرځوي. هغوی وویل چې له بده مرغه په بېلابېلو دورو کې د بهرنیو قوتونو تر فشار لاندې د دیني طبقې او دیني قوتونو د سیاسي او ملي چارو څخه د لرې ساتلو هڅې شوې دي، حال دا چې د پاکستان نظریاتي اساس او د ولس د اکثریت دیني تړاو غوښتنه کوي چې دولتي نظام د اسلامي اصولو له مخې جوړ شي. هغوی وویل که د هېواد واګې د امانتدارې، باکرداره او دیني شعور لرونکې رهبرۍ په لاس کې وای، نو ملت به له اوسنیو بحرانونو، بې باورۍ او اقتصادي ستونزو سره تر دې کچې نه مخ کېده. د جمعیت علماء اسلام مشرانو وویل چې سودي اقتصادي نظام د هېواد اقتصاد د پورونو په جال کې راګیر کړی او د سود له لعنت څخه تر خلاصون پرته د اقتصادي خپلواکۍ خوب نه شي پوره کېدای. هېواد باید د پورونو، ګرانو بیو، بې روزګارۍ او اقتصادي بې ثباتۍ څخه د ژغورلو لپاره پر اسلامي اقتصادي اصولو ولاړ نظام غوره کړي. هغوی ټینګار وکړ چې په سیاسي او اقتصادي تګلارو کې باید د بهرني فشار او ګټو پر ځای ملي خپلواکۍ، د ولس ګټو او اسلامي اصولو ته لومړیتوب ورکړل شي. پاکستان په حقیقي معنا د یوه خپلواک اسلامي فلاحي دولت جوړولو لپاره باید د اساسي قانون د اسلامي روح له مخې خپل حکومتي او اقتصادي نظام جوړ کړي.