ګوادر نارت فري زون کې د خرو د پروسس فابریکې لپاره ۴ جریبه نوره ځمکه ځانګړې شوه

کوټه (ویب نیوز)د ګوادر نارت فري زون کې پاکستانۍ او چینۍ ګډ شرکت شهزاد اېنډ شا (پرایوېټ) لمیټډ ته د خرو د مسلخ او پروسس فابریکې د جوړولو لپاره ۴ جریبه نوره ځمکه ځانګړې شوې، چې ورسره د دې پروژې لپاره د ځانګړې شوې ځمکې ټول مساحت ۱۵ جریبو ته رسېدلی دی. د سرچینو په وینا، د پروژې موخه د خرو د غوښې او څرمنو پروسس او چین په ګډون نړیوالو بازارونو ته د صادرولو زمینه برابرول دي. په پروژه کې د خرو لپاره د ځانګړي مسلخ، عصري پروسس واحدونو، سړې خونې، د غوښې د بسته‌بندۍ، د څرمنو د پروسس او نورو اړوندو اسانتیاوو د جوړولو پلان شامل دی. د معلوماتو له مخې، د پروژې لپاره په کال کې د یو لک او پنځوس زره خرو د پروسس هدف ټاکل شوی، چې د بشپړ ظرفیت له فعالېدو سره به د څارویو د پېرلو، لېږد، وترنري معاینې، ذبحې، پروسس، سړې زنځیرې، بسته‌بندۍ او صادراتو لپاره منظم سیستم ته اړتیا وي. سرچینې وايي چې د پروژې اساسي هدف چین ته د خرو د غوښې او څرمنو صادرول دي او په ګوادر نارت فري زون کې موقعیت به شرکت ته د صادراتي فعالیتونو لپاره سوداګریزې اسانتیاوې برابرې کړي. د پروژې لپاره له اړوندو پاکستاني او چینايي ادارو څخه لازمې اجازې او این او سي هم ترلاسه شوي دي. د پروژې له بشپړېدو سره په ګوادر کې د کارموندنې او صنعتي فعالیتونو د زیاتېدو تمه کېږي او د څارویو پالونکو، سوداګرو، ټرانسپورټي شرکتونو، مزدورانو، وترنري خدمتونو، پروسس او بسته‌بندۍ په برخو کې د کار او سوداګرۍ نوي فرصتونه رامنځته کېدای شي. سرچینې زیاتوي چې د پروژې د پراخ حجم له امله به د چاپېریال ساتنې، عامې روغتیا، د مسلخ د کثافاتو د علمي دفعې، د څارویو د روغتیا، حفظ‌الصحې، معیاري بسته‌بندۍ، سړې زنځیرې او نړیوالو خوراکي معیارونو مراعاتول هم مهم وي. د ۴ جریبه اضافي ځمکې له ځانګړې کېدو وروسته د پروژې ټول مساحت ۱۵ جریبو ته رسېدلی، خو د فابریکې د جوړېدو، تولید پیل، صادراتو حجم او د کارموندنې د شمېر وروستۍ جزیات به د پروژې له بشپړېدو او عملي فعالیت پیلولو وروسته څرګند شي.