د پښتونخوا ملي عوامي ګوند غونډه، د سپټمبر په ۱۷مه د کوټې ولسوالۍ جرګه جوړېږي، نواب ایاز خان جوګیزي

کوټه (ویب نیوز) د پښتونخوا ملي عوامي ګوند د کوټې ولسوالۍ کمېټې غونډه د سید شراف آغا په مشرۍ ترسره شوه، چې پکې د کوټې ولسوالۍ د جرګې د جوړولو لپاره د چمتووالي په اړه لارښوونې وشوې. د ګوند مرکزي عمومي منشي عبدالرحیم زیارتوال وویل، د درې ورځنۍ پښتون قومي جرګې د پرېکړو په رڼا کې به د جنوبي پښتونخوا په ټولو ولسوالیو کې جرګې جوړېږي، چې پکې به سیاسي او ټولنیز مشران، قومي مخور، پوهان، وکیلان، ځوانان، ښځې، مزدوران، بزګران، سوداګر، خبریالان او د ژوند د بېلابېلو برخو استازي ګډون کوي. نوموړي وویل، په دغو جرګو کې به د ناامنۍ، د پیسو لپاره د تښتونو، لوټمارۍ، وژنو، قبضه‌ګیرۍ، د لویو لارو د تړل کېدو، د ځمکو، غرونو او ځنګلونو د غیرقانوني او غیرآئیني انتقالونو او وېش، د سوداګرۍ د بندېدو او نورو اقتصادي، ټولنیزو او قومي ستونزو په اړه هر اړخیز بحث کېږي او د ګډونوالو د ارزښتناکو مشورو پر بنسټ به راتلونکی ګډ تګلوری ټاکل کېږي. د ګوند مرکزي منشي نواب محمد ایاز خان جوګیزي اعلان وکړ چې د کوټې ولسوالۍ جرګه به د سپټمبر په ۱۷مه ترسره کېږي او د جرګې چمتووالی به له نن څخه پیل شي. عبدالقاهر خان ودان وویل، د کوټې د ټولو جرګې غړو ته به بلنلیکونه ورسول شي او جرګه به د خلکو د کړاوونو د پای ته رسولو لپاره د هغوی د ارزښتناکو نظریاتو او وړاندیزونو پر بنسټ راتلونکی لائحۂ عمل ټاکي. د غونډې ویناوالو وویل، په کوټه کې میلیونونه خلک له بنسټیزو اسانتیاوو بې برخې دي، له یوې خوا د څښاک پاکې اوبه، تعلیم، روغتیا، روزګار او امن ورځ تر بلې کمېږي او له بلې خوا حکومتي واک او ملکي واکمني کمزورې کېږي. دوی وویل، په سوداګریزو مرکزونو، مارکیټونو، دوکانونو او بازارونو د بېلابېلو ادارو غیرقانوني چاپې او د سوداګرو د مالونو لوټل د اندېښنې وړ دي. د دوی په وینا، په هېواد کې غیرآئیني وضعیت سیاسي بې ثباتي لا زیاته کړې او تر هغه چې ټول ادارې د هېواد پر متفقه آئین عمل ونه کړي، له ملي بحرانونو څخه وتل ناشوني دي.