د بلوچستان په پوهنتونونو کې د فیسونو پر زیاتوالي د پي اېس اېف اندېښنه

کوټه (ویب نیوز) د پښتون سټوډنټس فېډرېشن بلوچستان صوبايي مشر رزاق عاصم په دولتي پوهنتونونو کې د سمسټر فیسونو پر پرله‌پسې او بې‌ساري زیاتوالي اندېښنه څرګنده کړې او ویلي یې دي چې لوړو فیسونو د بېوزلو او منځنۍ طبقې زده‌کوونکو لپاره د لوړو زده‌کړو دروازې تنګوي. نوموړي وویل چې په اقتصادي لحاظ کمزوري بلوچستان کې د لوړو فیسونو یوځلنی ورکول د زده‌کوونکو او کورنیو لپاره ستونزمن دي او ګڼ زده‌کوونکي د زده‌کړو پرېښودو ته اړ کېدای شي. رزاق عاصم له حکومته او پوهنتونونو وغوښتل چې د فیسونو د زیاتوالي سمدستي نوټس واخلي، زده‌کوونکو ته د فیسونو په برخه کې رعایت او د قسطونو اسانتیاوې برابرې کړي او مستحقو زده‌کوونکو ته د سکالرشپونو او مالي مرستو زمینه پراخه کړي.