د دشت د کرنیز عایداتي ټیکس پر راټولولو غونډه، اسسټنټ کمشنر د باج اخیستنې تور رد کړ

کوټه (ویب نیوز)په دشت کې د مستونګ د ډپټي کمشنر بهرام سلیم په لارښوونه د اسسټنټ کمشنر جاوید احمد سمالاني په مشرۍ له زمیندارانو سره د کرنیز عایداتي ټیکس د راټولولو په اړه غونډه وشوه، چې پکې د ټیکس پر وخت ورکولو، د زمیندارانو پر ستونزو او وړاندیزونو خبرې وشوې. په غونډه کې د انتظامیې چارواکو، پولیسو او د زمیندارانو استازو ګډون وکړ او اسسټنټ کمشنر له زمیندارانو وغوښتل چې خپل واجبات پر وخت جمع کړي او له ریونیو چارواکو سره همکاري وکړي. په دې موقع جاوید احمد سمالاني له زمیندارانو څخه د باج اخیستنې په اړه خپور شوی خبر په کلکه رد کړ او ویې ویل چې د بلوچستان د چیف سیکرټري او د کوټې کمشنر د لارښوونو له مخې یوازې د کرنیز عایداتي ټیکس د راټولولو لپاره اقدامات کېږي. نوموړي وویل چې انتظامیه هڅه کوي د ټیکس د راټولولو بهیر لا اغېزمن، شفاف او پر وخت ترسره کړي.