د ولس ستونزې حل کول زموږ لومړیتوب دی، میر سلیم خان کھوسه

کوټه (ویب نیوز) د پاکستان مسلم لیګ (ن) پارلماني مشر او د بلوچستان د مواصلاتو صوبايي وزیر میر سلیم خان کھوسه ویلي چې د ولس د ستونزو حل کول د حکومت په لومړیتوبونو کې شامل دي او اوسني حکومت د ولس د ستونزو او مشکلاتو د کمولو لپاره داسې اقدامات کړي چې د تېر وخت په حکومتونو کې یې مثال نه لیدل کېږي. د رسنیو له یوه پلاوي سره په خبرو کې نوموړي وویل چې د حکومت دروازې تل د ولس لپاره پرانیستې دي او بلوچستان د نورو صوبو برابرولو لپاره پر بېړني بنسټ اقدامات کېږي. میر سلیم خان کھوسه وویل چې بلوچستان یو سوله‌ییز او خوشحاله صوبه ده، که څه هم د ځینو کسانو هیله کېدای شي چې صوبه د پرمختګ پر ځای د شاتګ پر لور لاړه شي، خو دا یوازې د هغوی خوب دی. هغه وویل چې د بلوچستان منتخب استازي او سیاسي ګوندونه په دې خبره متفق دي چې بلوچستان باید پرمختګ وکړي او د پرمختګ پر لاره روان شي. نوموړي زیاته کړه چې بلوچستان اوس د نورو صوبو د برابرېدو پر لور روان دی او ډېر ژر به د نورو صوبو په کچه ودرېږي. میر سلیم خان کھوسه وویل چې ولس باید ځان مایوسه او یوازې ونه ګڼي، حکومت به د خلکو بشپړه لارښوونه کوي او د هغوی د ستونزو د حل لپاره د منتخب استازو دروازې به تل د ولس پر مخ پرانیستې وي.