د چمن پولیسو کارروایي، د ډزو په پېښه کې مبینه تورن کس ونیول شو، تومانچه ترې ترلاسه شوه

چمن (ویب نیوز) د چمن ضلعې پولیسو د کالج روډ د ډزو په پېښه کې د نذر محمد ولد نېک محمد، د ادوزي قوم، د وژل کېدو په تړاو د تحقیقاتو پر مهال مهم پرمختګ کړی او په پېښه کې د مبینې ښکېلتیا په تور یې قدرت الله نیولی او د هغه له قبضې څخه یې تومانچه هم ترلاسه کړې ده. د پولیسو په وینا، د ۲۰۲۶ کال د سپټمبر پر ۹مه په کالج روډ چمن کې د ډزو په پېښه کې نذر محمد سخت ټپي شوی و چې سمدستي سول روغتون چمن ته انتقال شو، خو د لومړنۍ درملنې وروسته د حالت د خرابوالي له امله کوټې ته ولېږدول شو، چې د سرانان سیمې ته نږدې یې د ټپونو له امله ساه ورکړه. د پېښې مقدمه نمبر ۹۳/۲۰۲۶ د ۳۰۲ ق د دفعې لاندې د نامعلومو کسانو پر ضد په کاریزات تاڼه کې درج شوې وه. له پېښې وروسته د مقتول خپلوانو د ډي سي کمپلېکس مخې ته د مړي په ایښودلو احتجاج کړی و، خو د پولیسو او ضلعي انتظامیې ترمنځ د بریالیو خبرو وروسته احتجاج پای ته ورسېد. د پېښې سمدستي نوټس اخیستو وروسته د چمن ضلعې ایس پي اعتزاز عارف د چمن سرکل د ډي ایس پي/اېس ډي پي او په مشرۍ ګډه تحقیقاتي ډله جوړه کړه او د تورنو کسانو د نیولو او د قضیې د اغېزمنو تحقیقاتو لپاره یې ځانګړې لارښوونې وکړې. د پولیسو په وینا، جې آی ټي د مسلکي تحقیقاتو، موجودو شواهدو او پرله‌پسې هڅو په پایله کې د سپټمبر پر ۱۴مه بریالۍ کارروایي ترسره کړه، قدرت الله یې ونیو او له هغه څخه یې تومانچه ترلاسه کړه. په دې اړه ډي ایس پي مجیب الرحمن، انسپکټر جهانګیر خان کاکړ او د کاریزات تاڼې اېس اېچ او عبدالجبار اڅکزي په خبري غونډه کې رسنیو ته د پولیسو د کارروایۍ او تحقیقاتو د پرمختګ په اړه معلومات ورکړل. پولیس چارواکو وویل چې د لومړنیو تحقیقاتو له مخې نیول شوی مبینه تورن کس د مقتول وراره دی، خو له نوموړي څخه نورې پلټنې روانې دي او د وژنې انګېزه، شواهد او د پېښې نور اړخونه په هر اړخیزه توګه څېړل کېږي. د چمن ضلعې ایس پي اعتزاز عارف د جې آی ټي بریالۍ کارروایي وستایله او ویې ویل چې د جرمي عناصرو پر ضد به بې توپیره قانوني کارروایي دوام ولري، د ولس د سر او مال ساتنه د پولیسو لومړیتوب دی او د قانون سرغړوونکي به د قانون له مخې د انصاف منګولو ته سپارل کېږي.