د ځنګلونو محکمې بریالي امیدواران: د دندې د بیا پیل اجازه دې راکړل شي، کنه احتجاج کوو

کوټه (وېب نیوز) د بلوچستان د ځنګلونو او ځنګلي ژوند محکمې بریالیو امیدوارانو غوښتنه کړې چې د میرټ او محکمانه قوانینو له مخې شوې مقررۍ دې ومنل شي او دوی ته دې سمدستي د خپلو دندو د بیا پیل اجازه ورکړل شي، کنه دوی به احتجاج ته اړ شي.د کوټې پریس کلب مخې ته د مظاهرې او خبري کنفرانس پر مهال د بریالیو امیدوارانو مشرانو، حبیب الله، کرم خان، حیات خان او نورو وویل چې په محکمه کې شوې مقررۍ د میرټ او قانون له مخې ترسره شوې دي، خو د دوی په وینا، یوه صوبايي وزیر په اسمبلۍ کې د دغو مقرریو په اړه داسې دریځ څرګند کړی چې له حقایقو سره سمون نه لري.د امیدوارانو په وینا، د ځنګلونو محکمې د بېلابېلو چوکیو لپاره اعلان د ۲۰۲۲ کال د دسمبر په ۱۷مه خپور کړی و، چې وروسته د ۲۰۲۴ کال د مارچ په ۲۹مه لغوه شو او بیا د ۲۰۲۵ کال د فبرورۍ په ۱۴مه د نوې اعلامیې له لارې اعلان خپور شو.دوی وویل چې د مقررۍ د ټاکل شوې طریقې له مخې یې خپل اسناد جمع کړل، ټېسټونه او مرکې ترسره شوې او بریالیو امیدوارانو ته د تقرر حکمونه ورکړل شول. د دوی په وینا، دوی ته په رسمي ډول د دندې د پیل اجازه هم ورکړل شوه او شاوخوا درې میاشتې یې خپلې دندې ترسره کړې، خو وروسته د ځنګلونو او ځنګلي ژوند محکمې د سیکشن افسر له لوري د نوټیفیکیشن په صادرېدو سره دغه مقررۍ لغوه شوې.امیدوارانو وویل، که د کوم ځانګړي تقرر، امیدوار یا څوکۍ په اړه قانوني یا انتظامي اعتراض موجود وي، نو باید شفافه پلټنه ترسره شي، خو ټولو بریالیو امیدوارانو ته دې د خپلو دندو د بیا پیل اجازه ورکړل شي.دوی له وزیراعلیٰ بلوچستان، چیف سیکرټري او نورو لوړپوړو چارواکو غوښتنه وکړه چې د دې معاملې سمدستي نوټس واخلي او د امیدوارانو اندېښنې هوارې کړي، کنه دوی به د احتجاج لاره خپله کړي.