د ولس خدمت به په اخلاص او دوام سره روان ساتل کېږي، سردار فیصل جمالی

کوټه (وېب نيوز) د بلوچستان صوبايي وزیر د مالدارۍ او لبنیاتو پراختیا سردارزاده میر فیصل خان جمالی ویلي چې د ولس بې له توپیره خدمت د هغه لومړیتوب دی او د خپلې انتخاباتي حلقې د خلکو د ستونزو د هواري او د بنسټیزو اسانتیاوو د برابرولو لپاره ټول ممکن اقدامات ترسره کېږي. نوموړي وویل چې په ضلع اوستا محمد کې د پرمختګ او سوکالۍ د بهیر چټکولو او د خلکو د ستونزو د دایمي هواري لپاره د حکومت شته وسایل کارول کېږي. له بېلابېلو سیمو څخه راغلو پلاوو له صوبايي وزیر سره د لیدنې پر مهال د سړکونو، تعلیم، روغتیا، برېښنا، ګاز، اوبو لګولو او نورو بنسټیزو اسانتیاوو اړوند خپلې ستونزې شریکې کړې. سردارزاده میر فیصل خان جمالی د پلاوو خبرې په غور واورېدلې او ډاډ یې ورکړ چې د ولسي ستونزو د هواري لپاره به له اړوندو محکمو او چارواکو سره اړیکې ونیول شي او عملي اقدامات به ترسره شي. نوموړي وویل چې ولسي استازیتوب یوازې یو منصب نه، بلکې یو مسؤلیت دی او دی هڅه کوي چې دغه مسؤلیت په بشپړ صداقت او اخلاص ترسره کړي. هغه زیاته کړه چې د انتخاباتي حلقې د ټولو سیمو مساوي پرمختګ د هغه په لومړیتوبونو کې شامل دی او هېڅ سیمه یا طبقه به له پامه ونه غورځول شي. نوموړي وویل چې د روانو پرمختیايي پروژو د پر وخت بشپړېدو ترڅنګ د نوو پروژو د منظورۍ او خلکو ته د بنسټیزو اسانتیاوو د برابرولو لپاره هم هڅې روانې دي. د پلاوو غړو د ولسي ستونزو د هواري لپاره د صوبايي وزیر د هڅو ستاینه وکړه، په داسې حال کې چې سردارزاده میر فیصل خان جمالی وویل چې د ولس د خدمت سفر به په اخلاص او دوام سره روان ساتل کېږي.