چاغي کې د سټي تاڼې پر برید ناکام، پولیسو په ځوابي عملیاتو کې وسله‌وال په شا وتمبول

کوټه (یو اېن اې) د چاغي ضلعې په سټي تاڼه د نامعلومو وسله‌والو لخوا شوی برید د رخشان رینج پولیسو د فوري او منظم ځوابي عملیاتو په ترڅ کې ناکام شو. د پولیسو په وینا وسله‌والو د تاڼې په شاوخوا درې بېلابېلو ځایونو کې غیرقانوني ناکې جوړې کړې وې، چې د اطلاع له رسېدو سره سم د ایس ایس پي چاغي په مشرۍ قوي پولیس ځواک سیمه ته ورسول شو او منظم عملیات یې پیل کړل. د عملیاتو په نتیجه کې وسله‌وال له سختې ماتې سره مخ شول او له سیمې تښتېدلو ته اړ شول، په داسې حال کې چې جوړې شوې ټولې ناکې هم پاکې کړل شوې دي. چارواکو ویلي چې د سیمې وضعیت تر کنټرول لاندې دی خو د تښتېدلو کسانو د نیولو لپاره پلټنیز عملیات روان دي.