د بلوچستان ګورنر په چين کې د بي واي ډي نوې انرژۍ فابريکه وکتله، پاکه انرژي يې د راتلونکي اقتصاد بنسټ وباله

کوټه( نوي ژوند)جعفر خان مندوخیل په چین کې د نوې انرژۍ فابريکې د ليدنې پر مهال وويل چې د برېښنايي موټرو او بيټرۍ ټيکنالوژۍ په برخه کې د چين پرمختګونه دا ثابتوي چې پايداري او اقتصادي پرمختګ يو ځای روانېدای شي. هغه وويل چې لمريزه انرژي او برېښنايي موټر نه يوازې د ځمکې د چاپېريال لپاره ګټور دي، بلکې د راتلونکي اقتصاد د ودې لپاره هم مهم شرط ګڼل کېږي، ځکه پاکې انرژۍ ته بدلون نوې صنعتونه، مسلکي دندې او د پانګونې فرصتونه رامنځته کوي. نوموړي زياته کړه چې د بلوچستان او پاکستان د اقتصادي ثبات لپاره په پاکه انرژۍ، برېښنايي تګ راتګ او شنې توليدي ټيکنالوژۍ کې شراکت يو روښانه لوری وړاندې کوي، او له دې سفره ترلاسه شوې نوې پوهه به په هېواد او صوبه کې د عملي او تخليقي کارونې لپاره وکارول شي، څو د پاک او سوکاله راتلونکي ګډ اهداف تر لاسه شي۔