محمود خان اڅکزي د خپلې دوسیې پر ضد بلوچستان هایکورټ ته مراجعه کړې

کوټه(نوی ژوند) د پښتونخوا ملي عوامي ګوند مشر، د قومي اسمبلۍ د اپوزیسیون رهبر او وتلی سیاستوال محمود خان اڅکزي د خپل پر ضد ثبت شوې دوسیه ننګولې او په بلوچستان هایکورټ کې یې اساسي قانوني عریضه وړاندې کړې ده. په عریضه کې له محکمې غوښتنه شوې چې ایف آی آر غیر اساسي قانوني وګرځوي او لغوه یې کړي. محمود خان اڅکزي د ګوند له مشرانو، فعالانو او حقوقي کارپوهانو سره د چهارشنبې په ورځ هایکورټ ته ورغلی و، چیرې چې د پښتونخوا ملي عوامي ګوند د وکیلانو فورم له لوري عریضه ثبت شوه. په عریضه کې ویل شوي چې ثبت شوې ایف آی آر د پاکستان له اساسي قانون او قانوني اصولو سره سمون نه لري او د اساسي حقونو او عادلانه قانوني بهیر خلاف ده. له محکمې غوښتنه شوې چې د مقدمې ټول قانوني اړخونه وڅېړي او که ایف آی آر قانوني او اساسي معیارونه نه پوره کوي نو لغوه دې یې کړي. د عریضې تر ثبت وروسته د رجسټرار دفتر د هغې د ارزونې بهیر پیل کړی او تمه ده چې په راتلونکو ورځو کې به د اورېدنې په اړه نور پرمختګونه مخې ته راشي.