پښتونخوا نېشنل عوامي ګوند د ملي تحریک مخکښه ګوند ګرځېدلې ده، خوشحال خان کاسي

کوټه (وېب نیوز) د پښتونخوا نېشنل عوامي ګوند د جنوبي پښتونخوا صوبایي سېکرټر فقیر خوشحال خان کاسي ویلي دي چې د ملي شهید عثمان خان کاکړ د پنځم تلین په مناسبت په قلعه سیف الله کې جوړ شوی تاریخي ولسي غونډه د پښتون ملي تحریک په مبارزه کې یو مهم پړاو دی. نوموړي وویل چې په غونډه کې د خلکو، په ځانګړي ډول د ښځو پراخ ګډون دا څرګندوي چې په پښتون ټولنه کې ملي شعور، سیاسي پوهاوی او جمهوري ارزښتونه لا پیاوړي شوي دي. هغه زیاته کړه چې پښتونخوا نېشنل عوامي ګوند اوس د پښتون ملي تحریک مخکښه او د ولس د هیلو حقیقي استازې ګوند ګرځېدلې ده او د قومي حقونو، جمهوري ارزښتونو، آئیني برلاسۍ، سولې او پرمختګ لپاره خپله مبارزه روانه ساتي. خوشحال خان کاسي د غونډې د بریا له امله د بېلابېلو سیمو څخه راغلو ولسونو، ښځو، ځوانانو او ګوندي فعالانو مننه وکړه او ژمنه یې وکړه چې د ملي شهید عثمان خان کاکړ فکر او مبارزه به لا پیاوړې کوي۔