د کراچۍ په ترهګریز برید کې د شهیدو رینجرز سرتېرو د جنازې لمونځ ادا شو

کوټه (وېب نیوز) د کراچۍ په ترهګریز برید کې د پاکستان رینجرز (سند) شهیدو سرتېرو د جنازې لمونځ ادا شو، چې پکې د کورنیو چارو وفاقي وزیر محسن نقوي، د سند ګورنر، د سند وزیراعلی، د رینجرز عمومي قوماندان، لوړپوړو ملکي او پوځي چارواکو او د شهیدانو کورنیو ګډون وکړ. ګډونوالو د شهیدانو قربانیو ته درناوی وړاندې کړ او له کورنیو سره یې خواخوږي څرګنده کړه. محسن نقوي وویل، د برید مسؤل ترهګر به خامخا د قانون منګولو ته وسپارل شي، او د سند ګورنر او وزیراعلی هم د ترهګرۍ د بشپړ ختمولو هوډ تازه کړ. د جنازې له لمانځه وروسته د شهیدانو جسدونه خپلو پلرنیو سیمو ته ولېږدول شول، چې هلته به په بشپړو پوځي مراسمو خاورو ته وسپارل شي. وروسته د کورنیو چارو وزیر د برید ځای هم وکوت او د امنیتي وضعیت جاج یې واخیست. د آی ایس پی آر په وینا، د هند ملاتړې ډلې جماعت الاحرار وسله‌والو د کراچۍ د صفوره په سیمه کې پر رینجرز کمپ برید کړی و، خو د رینجرز په چټک غبرګون کې درې بریدګر ووژل شول او یو بل ټپي حالت کې ژوندی ونیول شو، چې لومړنۍ پلټنې ښيي افغان تبعه دی. په برید کې درې رینجرز سرتېري شهیدان او څلور نور ټپیان شول، او په سیمه کې د لټون عملیات دوام لري. آی ایس پی آر ویلي چې د ترهګرو او د هغوی د ملاتړو پر ضد به پرېکنده اقدامات دوام ولري، او فیلډ مارشل عاصم منیر د شهیدانو قربانۍ د ملت د عزم نښه وبللې او ټینګار یې وکړ چې د ترهګرۍ تر بشپړ ختمېدو پورې به عملیات په پوره ځواک روان وي.