د پښتونخوا نیشنل عوامي ګوند غونډه، د امنیت او بنسټیزو اسانتیاوو پر خراب وضعیت سخته اندېښنه

کوټه (وېب نیوز) د پښتونخوا نیشنل عوامي ګوند د کوټې ولسوالۍ په غونډه کې په کوټه او نورو سیمو کې د امنیت خرابېدو، تښتونو، غلاوو، لوټمارۍ، د برېښنا او ګاز اوږدمهاله لوډشیډنګ، د څښاک اوبو کمښت، د ښار د پاکوالي خراب وضعیت او نورو ولسي ستونزو په اړه ژوره اندېښنه څرګنده شوه. ګډونوالو حکومت د خلکو د سر او مال په ساتنه کې ناکام وباله او غوښتنه یې وکړه چې د جرمونو پر ضد بې پرې عملیات، د رندوزۍ پولیس سټېشن بیا فعالول، د ښاري خدمتونو ښه کول او د منګله سیمې د خلکو د جبري بې‌ځایه کولو مخنیوی دې وشي. ګوند خبرداری ورکړ چې که ستونزې حل نه شي، له ولس سره به ګډ احتجاجي تحریک پیل کړي.