د سوئي ګېس د نوې بیې مهالویش د بلوچستان هایکورټ کې وننګول شو

کوټه (وېب نیوز) د سوئي ګېس شرکت د نوې بیې (ریټ شیډول) پر ضد د بلوچستان هایکورټ کې اساسي قانوني عریضه ثبت شوې ده. د عریضې وړاندې کوونکي سید نظیر آغا اېډووکېټ ویلي، نوی د ګېس نرخونه د پاکستان له اساسي قانون، په ځانګړې توګه د ۱۵۸مې مادې، او همدارنګه د ۷، ۸ او ۲۵ مادو سره په ټکر کې دي او د بلوچستان د خلکو اساسي حقونه تر پښو لاندې کوي. په عریضه کې له محکمې غوښتنه شوې چې نوی ریټ شیډول دې لغوه یا د وروستۍ پرېکړې تر صادرېدو پورې دې پرې عملي کېدل ودرول شي. تمه ده چې دغه قضیه به ډېر ژر د اورېدنې لپاره وړاندې شي.