بیرسټر ګوهر: اړیکې مو نه دي پرې کړې، تماسونه لا هم شته

اسلام‌آباد(ویب نیوز) د تحریک انصاف مشر بیرسټر ګوهر ویلي چې دوی له هېچا سره اړیکې نه دي پرې کړې او تماسونه لا هم دوام لري. نوموړي ویلي چې تحریک انصاف یوه سیاسي ډله ده چې ریښې یې د ولس په منځ کې دي او دوی به خپله سوله‌ییزه سیاسي مبارزه روانه ساتي. د بیرسټر ګوهر په وینا، شاوخوا ۱۵۰۰ د دوی پلویان نیول شوي او په خیبر پښتونخوا کې د ګوند وزیران او د اسمبلۍ غړي هم نیول شوي دي. هغه وویل چې تحریک انصاف اسلام‌آباد ته د یرغل لپاره نه ځي، بلکې د خپلو غوښتنو لپاره به په ولسواک ډول غږ پورته کوي، پاکستان او دولت تر هر څه لومړی ګڼي او قانون به په لاس کې نه اخلي. نوموړي وویل چې دوی ته ویل کېږي که مخکې لاړ شي، د ترهګرو په څېر به ورسره چلند وشي، خو د هغه په وینا تحریک انصاف ترهګره ډله نه ده بلکې سیاسي ګوند دی. بیرسټر ګوهر غوښتنه وکړه چې پر عدالتي پرېکړو دې عمل وشي او د پلویانو او مشرانو د نیولو او د کورونو د ادعا شویو نړولو په اړه دې وضاحت ورکړل شي.