د دانه سر د بس پېښې په اړه د ټپي مسافر نوې ادعا، پلټنو ته نوی اړخ ورکړ

ژوب (وېب نیوز) د دانه سر د بس پېښې یو ټپي مسافر ادعا کړې چې له پېښې مخکې د بس د چلوونکي او ځینو مسافرو ترمنځ لفظي شخړه شوې وه او وروسته چلوونکي په غوسه کې موټر د ژورې کندې پر لور اړولی و. د هغه په وینا، بس له کوټې څخه پېښور ته روان و او پکې ۴۹ کسان، چې ۴۵ مسافر، دوه چلوونکي او دوه کنډکټران شامل وو، سپاره وو. نوموړي دا هم وویل چې په یوه چک پوسټ کې د ایف سي ځواکونو له خوا له بس څخه ایراني ډیزل او نور توکي ضبط شوي وو، چې له امله یې چلوونکی سخت غوسه شوی و. چارواکي وایي، د ټپي مسافر بیان د پلټنو برخه ده، خو تر بشپړو تحقیقاتو مخکې د پېښې د اصلي علت په اړه وروستۍ پرېکړه نشي کېدای.