په خډکوچه او منګچر کې د نښتو پر مهال مسافر وړونکی کوچ د ډزو ښکار شو، ۴ کسان وژل شوي او ګڼ نور ټپیان دي

مستونګ/قلات(ویب نیوز) د مستونګ د خډکوچه او د قلات د منګچر په سیمو کې د امنیتي ځواکونو او وسله‌والو ترمنځ د نښتو پر مهال له کوټې څخه کراچۍ ته روان الیوسف مسافر وړونکی کوچ د ډزو په لړ کې ښکېل شو، چې د لومړنیو راپورونو له مخې څلور مسافر وژل شوي او ګڼ نور ټپیان شوي دي. ټپیان نږدې روغتونونو ته لېږدول شوي او د ځینو روغتیايي وضعیت د اندېښنې وړ بلل شوی دی. د نښتو له امله د کوټې ـ کراچۍ ملي لویه لاره د خډکوچه، منګچر او ځینو نورو حساسو سیمو په ګډون په موقتي ډول تړل شوې، چې له امله یې سلګونه موټر او مسافر په لاره کې بند پاتې دي. امنیتي ځواکونو په سیمه کې د لټون او تصفیې عملیات روان ساتلي او له خلکو یې غوښتي چې له غیر ضروري سفرونو ډډه وکړي او یوازې له باوري سرچینو معلومات ترلاسه کړي.