ټرمپ: د ایران پر برېښناکوټونو او پلونو د بریدونو څخه ډډه غواړو، تړون غوره لاره ده

واشنګټن (ویب نیوز) د امریکا ولسمشر ډونلډ ټرمپ ویلي، امریکا غواړي د ایران پر برېښناکوټونو او پلونو له بریدونو ډډه وکړي او له ایران سره تړون د جګړې او ویجاړۍ څخه غوره حل دی. هغه له فاکس نیوز سره په ټیلیفوني مرکه کې وویل چې د ایران په اړه د امریکا دریځ پیاوړی دی او د ایران پر ځمکې لاندې اټومي تاسیساتو د سمدستي برید اراده نه لري. ټرمپ وویل، ایران ته به د تړونونو د ماتولو اجازه ورنه کړل شي، خو د دواړو هېوادونو ترمنځ خبرې مثبتې وې. نوموړي زیاته کړه چې د جمهوري غوښتونکي ګوند ډېر مشران پر ایران د پوځي فشار دوام غواړي، خو که ایران تړون وکړي، دا به غوره وي. ټرمپ ادعا وکړه چې ایران د اټومي وسلو نه جوړولو سره موافقه کړې او اوس یوازې د تړون وروستۍ بڼه پاتې ده، خو خبرداری یې ورکړ چې که تړون ونه شي، امریکا به بیا هم اقدام وکړي.