په بدخشان کې د طالبانو ضد بريدونه زيات شوي، په بېلابېلو ولسواليو کې نښتو امنيتي وضعيت کړکېچن کړی

کابل(وېب نیوز) د افغانستان د بدخشان ولايت په بېلابېلو سيمو کې د طالبانو ضد وسلوالو فعاليتونه زيات شوي او د وروستيو نښتو له امله امنيتي وضعيت کړکېچن بلل کېږي. د يفتل او زېباک ولسواليو وروستيو پېښو د طالبانو د بشپړ کنټرول د ادعاوو په اړه هم پوښتنې راولاړې کړې دي. د افغانستان فريډم فرنټ ادعا کړې چې جنګيالو يې له کابل څخه بدخشان ته د روان طالب پوځي کاروان پر ضد راکټي بريد کړی، چې له امله يې اووه طالب ځواکونه وژل شوي او څو نور ټپيان شوي دي. د ډلې په وينا، جنګيالو د طالبانو د کاروان حرکت تر څارنې وروسته دغه بريد ترسره کړی. فريډم فرنټ دا ادعا هم کړې چې د زېباک ولسوالۍ په سيمه کې يې د طالبانو دوه پوځي ډرونونه نسکور کړي او په يوه بله پېښه کې يې طالب چورلکې د ناستې پرته بېرته ستنېدو ته اړ کړې دي. بلخوا افغان خبريال بلال سروري ويلي چې دغه پرله‌پسې بريدونه د فريډم فرنټ د پوځي وړتيا، استخباراتي همغږۍ او منظمې تګلارې څرګندونه کوي، په داسې حال کې چې د افغانستان پخواني مرستيال ولسمشر امرالله صالح ويلي د طالبانو پر ضد سياسي او پوځي مقاومت به لا منظم شي. د دغو ادعاوو په اړه د طالبانو چارواکو تر اوسه رسمي غبرګون نه دی ښودلی.