په بدخشان کې د طالبانو د اطلاعاتو او کلتور رئیس ذبیح الله امیري په وسله وال برید کې ووژل شو

بدخشان (ویب نیوز): د افغانستان د بدخشان ولایت د طالبانو د اطلاعاتو او کلتور رئیس ذبیح الله امیري د بهارک ولسوالۍ په سیمه کې د وسله والو په برید کې ووژل شو. د طالبانو د چارواکو په وینا، هغه د سهار پر مهال دفتر ته د تګ پر وخت د بهارک ـ فیض آباد پر لویه لاره د موټرسایکل سپرو بریدګرو تر برید لاندې راغی، چې له امله یې یو ساتونکی هم لږ ټپي شو. چارواکي وایي، د ساتونکو په ځوابي ډزو کې یو بریدګر ووژل شو او بل ژوندی نیول شوی، چې دا مهال تر درملنې لاندې دی. د پېښې د انګېزې په اړه لا هم پلټنې روانې دي او تر اوسه هېڅ ډلې یا کس د برید مسؤلیت نه دی منلی. ذبیح الله امیري د طالبانو د حکومت له پېژندل شوو رسنیزو څېرو څخه و او له څو کلونو راهیسې یې د بدخشان د اطلاعاتو او کلتور د رئیس په توګه دنده ترسره کوله.