په خېبر او نوشکي کې د امنیتي ځواکونو عملیات، ۳۲ وسله وال ووژل شول

راولپنډۍ (ویب نیوز): د پاکستان د پوځ د عامه اړیکو ادارې (آی ایس پي آر) ویلي، امنیتي ځواکونو د خېبر پښتونخوا د خېبر ولسوالۍ او د بلوچستان د نوشکي ولسوالۍ په بېلابېلو سیمو کې د استخباراتي معلوماتو پر بنسټ بریالي عملیات ترسره کړي، چې په ترڅ کې یې ټولټال ۳۲ وسله وال وژل شوي دي. د اعلامیې له مخې، په خېبر کې ۲۴ او په نوشکي کې ۸ وسله وال وژل شوي، او د عملیاتو پر مهال وسلې، مهمات او چاودېدونکي توکي هم ترلاسه او له منځه وړل شوي دي. آی ایس پي آر ویلي، په سیمه کې د پاکولو عملیات دوام لري، څو د وسله والو او د هغوی د همکارانو شتون په بشپړه توګه ختم شي. بلخوا وزیراعظم شهباز شریف او ولسمشر آصف علي زرداري د دغو بریالیو عملیاتو له امله امنیتي ځواکونو ته مبارکي ورکړې او د ترهګرۍ پر ضد د مبارزې د دوام ژمنه یې تازه کړې ده.