د جمعيت علماء اسلام د کوټې ولسوالۍ له لوري د اګست له لومړۍ نېټې تنظيمي سفرونه پيلېږي

کوټه(ویب نیوز) د جمعيت علماء اسلام د کوټې ولسوالۍ امير شيخ الحديث مولانا عبدالرحمن رفيق، ضلعي عمومي سېکرټر حاجي عين الله شمس او سينئر مرستيال امير مولانا خورشيد احمد اعلان وکړ چې د اګست له لومړۍ نېټې څخه به د تحصيلونو او يونټونو په کچه تنظيمي سفرونه پيل شي، چې موخه يې د ګوند تنظيمي جوړښت لا پياوړی کول، په يونټي کچه د تنظيمي فعاليتونو پراخول، له کارکوونکو سره اړيکې ټينګول او د تنظيمي مسؤوليتونو اغېزمن پرمخ وړل دي. دوی د استازو غونډې ته د وينا پر مهال وويل چې د دغو سفرونو له بشپړېدو وروسته به د کوټې ولسوالۍ په څلورو ټاونونو کې ستر د علماوو کنونشنونه جوړ شي او د جمعيت علماء اسلام له نويو شامل شويو غړو سره به د هرکلي ځانګړې او باوقاره غونډه هم ترسره شي، څو هغوی له تنظيمي نظام سره بلد او روحيه يې لوړه شي. مشرانو ټينګار وکړ چې د جمعيت علماء اسلام اساسي موخه په هېواد کې د اسلامي عادلانه نظام نافذول دي او د دې ستر هدف لپاره د ګوند مشرتابه او کارکوونکي هر ډول قربانۍ ته چمتو دي. هغوی زياته کړه چې له بده مرغه، سره له دې چې پاکستان د اسلام په نوم جوړ شوی، لا هم د اسلامي نظام د نافذېدو هيله نه ده پوره شوې، او د هېواد اوسنی سياسي، اقتصادي او ټولنيز حالت دا غوښتنه کوي چې ملت ته داسې صادقه، امانتداره او وړ قيادت په لاس ورشي چې د قرآن او سنتو په رڼا کې د ولس رښتينې لارښوونه وکړي، او جمعيت علماء اسلام ځان د همدې ډول ولسپال او باصلاحيته مشرتابه وړ بولي.