د پاکستان سنټرل ماینز لیبر فدراسیون د کان پېښې د مسؤلینو د سختې سزا غوښتنه وکړه

کوټه(وېب نیوز) د پاکستان سنټرل ماینز لیبر فدراسیون د سورنج د سپین کاریز د سکرو کان په چاودنه کې د شاوخوا ۳۸ کان‌کیندونکو پر مړینه ژوره خواشیني څرګنده کړې او له حکومت څخه یې غوښتي چې د پېښې رڼه، بې پرې او لوړه کچه پلټنه ترسره کړي، مسؤل کسان وپېژني او د قانون له مخې دې سخته سزا ورکړي. د فدراسیون مشرانو وویل، د کانونو د خوندیتوب نشتوالی او د پېښو پټول د کارګرانو د حقونو ښکاره سرغړونه ده. دوی غوښتنه وکړه چې د قراردادي سیستم پای ته ورسول شي، د کانونو ورځنۍ تفتیش، د هوا رسولو (وینټیلیشن) سیسټم، د ګاز څارنه او د کارګرانو لپاره د خوندیتوب وسایل لکه هیلمټ، ماسک، عینکې او اکسیجن سلنډرونه لازمي وګرځول شي او د خوندیتوب له قوانینو سرغړوونکو شرکتونو پر ضد دې سخت قانوني اقدامات وشي.