د سوات په کبل سیمه کې ځانمرګی برید، د ۶ پولیس سرتېرو په ګډون ۱۵ کسان شهیدان او ۱۰ ټپیان

سوات (وېب نیوز)د خېبر پښتونخوا د سوات ولسوالۍ د کبل په سیمه کې د پولیسو مرکز ته نږدې په ځانمرګي برید کې د ۶ پولیسو سرتېرو په ګډون ۱۵ کسان شهیدان او ۱۰ نور ټپیان شوي دي. د پولیسو په وینا، ځانمرګي بریدګر غوښتل د پولیسو مرکز ته ننوځي، خو د امنیتي سرتېرو له لوري تر درول کېدو وروسته یې د دروازې مخې ته ځان والوزاوه. د پېښې له ځایه د انسان سر هم موندل شوی چې ښايي د بریدګر وي، او لومړنۍ څېړنې ښيي چې بریدګر افغان وګړی و. ټپیان او د شهیدانو جسدونه سیدو شریف مرکزي روغتون ته لېږدول شوي دي. د خېبر پښتونخوا وزیراعلی د پېښې راپور غوښتی او د ټپیانو لپاره یې د غوره طبي اسانتیاوو د برابرولو لارښوونه کړې، په داسې حال کې چې وزیراعظم شهباز شریف او د کورنیو چارو وزیر محسن نقوي برید په کلکو ټکو غندلی، د شهیدانو له کورنیو سره یې خواخوږي څرګنده کړې او د ترهګرۍ د بشپړ له منځه وړلو هوډ یې تکرار کړی دی.