د مېډیا کارکوونکو ستونزو حل د حکومت مسؤلیت دی، د بلوچستان مېډیا فورم

کوټه (ویب نیوز) د بلوچستان مېډیا فورم په یوه اعلامیه کې ویلي چې د بلوچستان له مېډیا کارکوونکو، خبریالانو او د ورځپاڼو له صنعت سره هر ډول بې‌انصافي، تبعیضي چلند او زیاتی به د منلو وړ نه وي. فورم ویلي، خبریالان د ټولنې سترګې او غوږونه دي او په سختو شرایطو کې خلکو ته کره او پر وخت معلومات رسوي، نو ځکه د هغوی د ستونزو حل د حکومت لومړنی مسؤلیت دی. فورم غوښتنه کړې چې د بلوچستان ټولو راجستر شوو سیمه‌ییزو خبریالانو ته دې میاشتنی حکومتي وظیفه ورکړل شي، څو د مالي ستونزو له امله د هغوی مسلکي فعالیتونه اغېزمن نه شي. اعلامیه زیاتوي چې شاعران، لیکوالان او ادیبان د بلوچستان د ژبې، کلتور او تاریخ په ساتنه او ترویج کې مهم رول لري، خو د حکومت له لوري ورته لازم ملاتړ نه دی شوی، له همدې امله دې د هغوی لپاره ځانګړي فنډونه، وظیفې، جایزې او د چاپ اسانتیاوې برابرې شي. فورم همداراز له صوبایي او فدرالي حکومتونو وغوښتل چې د مېډیا صنعت اقتصادي ستونزې حل کړي، د خبریالانو د خوندیتوب، بیمې، درملنې، مالي ملاتړ او د بیان ازادۍ د خوندي کولو لپاره دې عملي او اغېزمن ګامونه پورته کړي.