د وزیراعظم او د جائیکا مشر ملاقات، د اقتصادي اصلاحاتو او پرمختیايي همکارۍ پر پراختیا هوکړه

پاکستان او جاپان د اوږدمهالې ملګرتیا د لا پیاوړتیا عزم څرګند کړ
اسلام آباد (ویب نیوز) وزیراعظم محمد شهباز شریف د جاپان نړیوالې همکارۍ ادارې (جائیکا) د مشر ډاکټر تناکا اکیهیکو په مشرۍ د ۹ کسیز پلاوي سره ملاقات کړی، چې پکې د پاکستان او جاپان ترمنځ د اوږدمهالې ملګرتیا، اقتصادي اصلاحاتو او بېلابېلو پرمختیايي برخو کې د همکارۍ پر پراختیا خبرې شوې دي. وزیراعظم د جائیکا پلاوي هرکلی وکړ او ویې ویل چې پاکستان له جاپان او جائیکا سره خپلې تاریخي اړیکې ډېرې مهمې ګڼي او هیله لري چې د جائیکا د مشر سفر به د دواړو هېوادونو اړیکې لا پیاوړې کړي. شهباز شریف وویل چې حکومت د ګډو هڅو له لارې له سختو اقتصادي ستونزو سره مقابله کړې او اوس د دوامدار اقتصادي پرمختګ لپاره د اصلاحاتو بهیر په چټکۍ روان دی. نوموړي وویل چې د حکومت د اصلاحاتو په پایله کې په تېرو درېیو کلونو کې دولتي عواید زیات شوي دي. وزیراعظم زیاته کړه چې ځوانانو ته د مهارتونو، تخنیکي زده کړو او باعزته روزګار برابرول، د ښځو پیاوړي کول او د معدنیاتو د څانګې پرمختګ د حکومت مهم لومړیتوبونه دي. هغه د معدنیاتو، روغتیا، تعلیم، ښاري او کلیوالي پرمختګ، فني روزنې او صنعتي ودې په برخو کې د جائیکا د تخنیکي همکارۍ هرکلی وکړ. د ملاقات پر مهال د کوچنیو او منځنیو کاروبارونو د ودې، د سمیډا اصلاحاتو او د صادراتو د زیاتوالي لپاره د همکارۍ پر پراختیا هم خبرې وشوې. د جائیکا مشر ډاکټر تناکا اکیهیکو په پاکستان کې د تود هرکلي مننه وکړه او ویې ویل چې جائیکا چمتو ده له پاکستان سره په بېلابېلو برخو کې خپلې همکارۍ لا پراخې کړي. نوموړي د منځني ختیځ د سولې لپاره د پاکستان د سفارتي هڅو ستاینه هم وکړه. په ملاقات کې وفاقي وزیرانو، د وزیراعظم ځانګړو مرستیالانو او نورو لوړپوړو چارواکو هم ګډون درلود.