د پاکستان او امریکا ترمنځ سوداګریزو خبرو کې پرمختګ، د تخنیکي چارو د ژر بشپړېدو هوکړه

د مالیې وزیر محمد اورنګزیب او امریکايي سوداګریز استازي جیمیسن ګریئر ترمنځ مجازي ناسته
اسلام آباد (ویب نیوز) د پاکستان او امریکا ترمنځ په سوداګریزو خبرو کې پرمختګ شوی او د پاتې تخنیکي چارو د ژر حل کولو هوکړه شوې ده. د پاکستان د مالیې وزیر محمد اورنګزیب د امریکا له سوداګریز استازي جیمیسن ګریئر سره مجازي ملاقات کړی، چې پکې د پاک امریکا سوداګریزو مذاکراتو د پرمختګ جاج اخیستل شوی دی. د ملاقات پر مهال محمد اورنګزیب په خبرو کې پر شوې پرمختګ خوښي څرګنده کړه او ویې ویل چې له امریکا سره پیاوړې سوداګریزه او پانګواله ملګرتیا د پاکستان مهمه ترجیح ده. نوموړي وویل چې د دواړو هېوادونو ترمنځ سوداګریز همکاری د پاکستان د صادراتو پر بنسټ اقتصادي ودې لپاره ډېره مهمه ده. دواړو خواوو د خبرو اترو د رفتار د ساتلو، د تخنیکي کچې مذاکراتو چټکولو او د سوداګریز چوکاټ د ژر بشپړولو لپاره د نږدې اړیکو پر دوام اتفاق وکړ. د مالیې وزیر د پاکستان او امریکايي ایکسپورټ امپورټ بانک ترمنځ د همکارۍ پر دوام ټینګار وکړ او ویې ویل چې اقتصادي همکاري به د دواړو هېوادونو سوداګرو ته د تجارت او پانګونې نوي فرصتونه برابر کړي. امریکايي سوداګریز استازي جیمیسن ګریئر د پاکستان پر دوامدارې همکارۍ ستاینه وکړه او د کارګرۍ او مقرراتي اصلاحاتو په برخه کې یې پرمختګ د ستاینې وړ وباله. په غونډه کې دواړو هېوادونو د خپلې اوږدمهالې اقتصادي ملګرتیا د لا پیاوړتیا او دوه اړخیزې سوداګرۍ د ودې ژمنه هم تکرار کړه.