رانا ثناءالله: د محسن نقوي څرګندونې بې‌مفهومه دي، هېواد د آئیني او پارلماني نظام له مخې روان دی

کوټه (ویب نیوز): د وزیراعظم سلاکار او سناتور رانا ثناءالله د کورنیو چارو د وفاقي وزیر محسن نقوي د وروستیو څرګندونو په غبرګون کې ویلي چې د هغه خبرې بې‌مفهومه دي او څرګند سیاق او سباق نه لري. نوموړي له یوې خصوصي ټلوېزیوني شبکې سره په خبرو کې وویل، که محسن نقوي وایي چې نظام ناکام شوی، نو باید روښانه کړي چې د کوم نظام یادونه کوي، ځکه پاکستان د ۱۹۷۳م کال د آئین او پارلماني جمهوري نظام له مخې اداره کېږي او همدا آئین د فدراسیون بنسټ دی. رانا ثناءالله زیاته کړه چې د نویو اداري واحدونو، نویو صوبو او پیاوړي سیمه‌ییز حکومت په اړه بحث کېدای شي، خو ټول اقدامات باید د آئین په چوکاټ کې ترسره شي. هغه وویل، د سیاسي او پوځي مشرتابه ترمنځ د متقابل احترام او همغږۍ له امله هېواد په معرکهٔ حق کې بریا ترلاسه کړې ده.