حافظ محمد صدیق مدني: ګراني، د برېښنا او تېلو لوړو بیو د خلکو او بزګرانو ژوند سخت کړی

کوټه(ویب نیوز) د جمعیت علمای اسلام د چمن ولسوالۍ د بلوچستان مشر حافظ محمد صدیق مدني ویلي، په هېواد کې د ګراني، د برېښنا، ګاز او پټرولیمي توکو د لوړو بیو، بې‌روزګارۍ او اقتصادي ستونزو له امله د عامو خلکو، مزدورانو، بزګرانو او منځنۍ طبقې ژوند له سختو ستونزو سره مخ شوی دی. نوموړي وویل حکومت باید یوازې د شمېرو پر بنسټ د اقتصادي پرمختګ ادعاوې ونه کړي، بلکې خلکو ته عملي اسانتیاوې برابرې کړي، د کرنې لګښتونه راکم، بزګرانو ته د حاصلاتو مناسبې بیې او مزدورانو ته د ګراني له کچې سره سم مزدوري ورکړي. هغه زیاته کړه چې د خلکو مالیات ملي امانت دی او باید د تعلیم، روغتیا، روزګار او عامه هوساینې لپاره ولګول شي، او د اقتصادي بحران د حل لپاره دې پر عامو خلکو د بار زیاتولو پر ځای غیر ضروري دولتي لګښتونه کم او عادلانه اقتصادي پالیسۍ عملي شي.