ایران پر قطر د درېیو پیلوټانو د نیولو تور لګولی

تهران (ویب نیوز) ایران پر قطر تور لګولی چې درې ایراني پیلوټان یې نیولي او د ګڼو ډیپلوماتیکو هڅو سربېره ایراني چارواکو ته له هغوی سره د لیدنې اجازه نه ورکول کېږي. ایراني چارواکو د لومړي ځل لپاره په رسمي ډول ادعا کړې چې د مارچ په دویمه نېټه په قطر کې پر یوه امریکايي پوځي اډه له برید وروسته ورک شوي د ایران د هوايي ځواک درې پیلوټان د قطري ځواکونو له خوا ژوندي نیول شوي دي. ایراني پوځي چارواکو له نړیوال سره صلیب کمېټې (آی سي آر سي) څخه غوښتنه کړې چې د پیلوټانو د حالت معلومولو او د هغوی د خوشې کېدو لپاره بېړني اقدامات وکړي. د آی سي آر سي په نوملړ کې د استول شوي لیک له مخې، ایراني پوځي چارواکي برید جنرال محمد باقر زاده ویلي چې د ۲۰۲۶ کال د مارچ په دویمه نېټه د یوه ماموریت پر مهال پیلوټ ماجد کاظمي وژل شوی، خو درې پیلوټان جواد صالحي، عبدالمجید دشتیان او عمران بهروشیان د قطر له خوا نیول شوي دي. ایراني جنرال د قطر اقدام د جنګي بندیانو په اړه د جنیوا کنوانسیونونو او نورو نړیوالو قوانینو سرغړونه بللې او ویلي یې دي چې د ګڼو ډیپلوماتیکو اړیکو سربېره ایراني چارواکو ته له درېیو پیلوټانو سره د لیدنې یا مرکې اجازه نه ده ورکړل شوې. هغه زیاته کړې چې پیلوټانو ته له خپلو کورنیو او اړوندو چارواکو سره د اړیکې اجازه هم نه ده ورکړل شوې او باید د دې موضوع په اړه څېړنې ترسره شي.