کوټه کې د ګازو د پایپ لاین د ترمیم ځنډ؛ خلک له سختو ستونزو سره مخ دي

کوټه (ویب نیوز) کې له دوو اوونیو تېرېدو سره سره د ګازو د پایپ لاین د ترمیم چارې لا هم نه دي بشپړې شوې او د خلکو لپاره د ګازو د بېرته برابرولو اغېزمن اقدامات هم نه دي شوي. د ګازو د کمښت له امله خلک اړ شوي چې په دې عصري دور کې له ګران بیه ایل پي جي او لرګیو څخه د سون توکو په توګه استفاده وکړي، چې له امله یې د کورنیو مالي لګښتونه زیات شوي او خلک له جدي ستونزو سره مخ دي. د ګازو د پایپ لاین په ترمیم کې پرله‌پسې ځنډ او بې‌غوري د کوټې د اوسېدونکو لپاره په لوی عذاب بدله شوې ده. خلک له اړوندو چارواکو غوښتنه کوي چې د کورنیو او سوداګریزو مصرفوونکو لپاره د ګازو دوامداره او د بشپړ فشار سره رسونه یقیني کړي. د ګازو د نشتوالي ترڅنګ د زرګونو روپیو اضافي ثابتو لګښتونو او اووربلینګ شکایتونه هم د خلکو اندېښنې زیاتې کړې دي. د کوټې اوسېدونکي وايي چې د ګازو د پرله‌پسې بندښت له امله یې ژوند له سختو ستونزو، ذهني فشار او مالي زیانونو سره مخ شوی او اړوند چارواکي باید د ستونزې د ژر تر ژره حل لپاره عملي ګامونه پورته کړي.