د جنیټیک بدلون له لارې د کولېسټرول کمولو په برخه کې مهم پرمختګ

واشنګټن (ویب نیوز): ساینس پوهانو د جنیټیک درملنې له لارې د کولېسټرول کمولو په برخه کې د یوه نوي درملیز میتود مهم پرمختګ اعلان کړی، د لومړنیو څېړنو له مخې د جنیټیک درملو یوازې یوې اندازې سره په ځینو ناروغانو کې د خراب کولېسټرول ایل ډي ایل کچه شاوخوا 50 سلنه راټیټه شوې او دغه اغېز تر یوه کال پورې پاتې شوی دی. په څېړنه کې د سی آر آی ایس پي آر ټکنالوژۍ له لارې د اېن جي پي ټي ایل 3 په نوم جین په نښه شوی، خو په لومړنۍ څېړنه کې یوازې 15 کسان شامل وو، ځکه نو کارپوهانو د وروستۍ پایلې لپاره د لا زیاتو او اوږدمهاله څېړنو اړتیا څرګنده کړې ده. څېړونکي وايي هغه کسان چې په طبیعي ډول په دغه جین کې بدلون لري، د کولېسټرول او ټرای ګلیسرایډونو کچه یې ټیټه او د زړه د ناروغۍ خطر یې هم کم وي. د تجربوي درملنې لوړه اندازه ترلاسه کوونکو څلورو کسانو کې دوه میاشتې وروسته د ایل ډي ایل کچه شاوخوا 50 سلنه او د ټرای ګلیسرایډونو کچه 55 سلنه کمه شوې، چې یو کال وروسته هم دغه کموالی موجود و. کارپوهان وايي که په راتلونکو لویو طبي ازموینو کې دغه درملنه خوندي او اغېزمنه ثابته شوه، نو په راتلونکي کې ښايي ځینې ناروغان د ټول عمر لپاره د هره ورځ درملو پر ځای یوازې د یوه جنیټیک علاج له لارې د کولېسټرول کچه ټیټه وساتي، خو اوس مهال دغه درملنه عامو ناروغانو ته نه ده وړاندې شوې.