که د سیندونو د اوبو تړون پاتې نه شي، د نړۍ هېڅ تړون به هم پاتې نه شي، مصدق ملک

اسلام اباد (ویب ډیسک) د اقلیم بدلون وفاقي وزیر سناتور مصدق ملک ویلي، که د سیندونو د اوبو تړون پاتې نه شي، نو د نړۍ هېڅ تړون به هم پاتې نه شي او پاکستان به په هر صورت کې د خپلو اوبو ساتنه یقیني کوي. نوموړي په اسلام اباد کې د اوبو د زېرمو د ساتنې په یوه غونډه کې د وینا پر مهال وویل چې د خپلو اوبو ساتنه د پاکستان لومړیتوب او سره کرښه ده. مصدق ملک وویل چې د نړیوالې منځګړیتوب محکمې د سیندونو د اوبو تړون په اړه پرېکړه کړې ده، او که د نړیوالې محکمې پرېکړه ونه منل شي، نو موضوع به یوازې تر اوبو محدوده پاتې نه شي. وفاقي وزیر وویل، که یو هېواد د نړیوالې منځګړیتوب محکمې پرېکړه ونه مني، نو په نړۍ کې به د ځنګل قانون نافذ شي، او که د ځنګل قانون نافذول وي، نو پاکستان هم ورته چمتو دی. هغه زیاته کړه چې که د سیندونو د اوبو تړون له منځه ولاړ شي، نو د نړۍ هېڅ نړیوال تړون به د اعتبار وړ پاتې نه شي. مصدق ملک وویل چې پاکستان پخوا هم د خپلو اوبو ساتنه کړې او په راتلونکي کې به هم د خپلو اوبو او حقونو د ساتنې لپاره هر ډول ممکن اقدامات ترسره کړي.