د صوبې د وېش پر ضد د سند ایالتي اسمبلۍ پرېکړه لیک تصویب کړ

کوټه (ویب نیوز) د سند د وېش پر ضد د سند په ایالتي اسمبلۍ کې پرېکړه لیک تصویب شو، چې د پاکستان پیپلز ګوند د اسمبلۍ غړي نثار کهوړو وړاندې کړی و. د سند اعلی وزیر مراد علي شاه وویل، له مخالفو غړو څخه غوښتنه شوې وه چې په ګډه پرېکړه لیک تصویب کړي او نثار کهوړو د اسمبلۍ د اصولو او مقرراتو له مخې د پرېکړه لیک مسوده چمتو کړې وه، خو مخالفو غړو غوښتنه وکړه چې په پرېکړه لیک کې د نویو انتظامي واحدونو د جوړولو موضوع هم شامله شي. مراد علي شاه وویل، د انتظامي واحدونو جوړول د سند د وېش له اساسي موضوع سره تړل مناسب نه دي او که پر دې موضوع بحث کول وي، جلا پرېکړه لیک وړاندې کېدای شي. نوموړي زیاته کړه چې حکومت د ځايي حکومتونو د پیاوړتیا ملاتړ کوي او په دې برخه کې د نورو اقداماتو لپاره هم چمتو دی. د سند اعلی وزیر په وینا، مخالفو غړو د ګډ پرېکړه لیک پر ملاتړ د هوکړې پر ځای له اسمبلۍ څخه واک آوټ وکړ، چې د نوموړي په باور د هغوی نیت یې څرګند کړ. صوبايي وزیر شرجیل مېمن هم د اپوزېسیون پر احتجاج او واک آوټ نیوکه وکړه او ویې ویل چې د پي ټي آی په ګډون مخالفو ګوندونو د غونډې بایکاټ وکړ، خو د پیپلز ګوند غړي په ایوان کې موجود وو. د سند اسمبلۍ غونډه تر سبا د ماسپښین تر دوو نیمو بجو پورې وځنډول شوه.