زوړ او خراب رېلوې ټریک، د اورګاډو له پټلۍ د وتلو پېښې زیاتې شوې

کوټه (ویب نیوز) د رېلوې ټریک د خراب حالت له امله د اورګاډو له پټلۍ څخه د وتلو پېښې زیاتې شوې دي، او تېره میاشت له لسو ډېرې پېښې ثبت شوې دي چې له امله یې د رېلوې چارې او د اورګاډو مهالویشونه سخت اغېزمن شوي دي. د کراچۍ، کوټې او نورو ښارونو څخه راتلونکي ګڼ اورګاډي څو ساعته ځنډېدلي، چې له امله یې مسافر له سختو ستونزو سره مخ دي. د معلوماتو له مخې علامه اقبال ایکسپریس ۶ ساعته او ۴۰ دقیقې، پاک بزنس ایکسپریس ۶ ساعته او ۳۰ دقیقې، تېزګام ایکسپریس ۳ ساعته او ۳۰ دقیقې، عوام ایکسپریس ۲ ساعته او ۲۰ دقیقې، خیبر میل ایکسپریس ۲ ساعته او ۱۵ دقیقې او ګرین لاین ایکسپریس یو ساعت او ۴۰ دقیقې ځنډېدلي دي. سرچینې وايي چې د رېلوې ټریک خراب حالت د خوندي سفر په اړه د رېلوې ادارې پر دعوو هم پوښتنې راپورته کړې دي.