د نظام د بیا تنظیمولو اړتیا ده، موخه یې د نظام ښه کول دي، محسن نقوي

لاهور(وېب نیوز) د کورنیو چارو وفاقي وزیر محسن نقوي ویلي چې موږ ټولو ته باید ومنو چې د نظام د بیا تنظیمولو اړتیا ده، خو د نظام د بیا تنظیمولو موخه د کوم حکومت یا سیاسي ګوند ختمول نه دي، بلکې په نظام کې د شته نیمګړتیاوو له منځه وړل او د هغه ښه کول دي. یوې غونډې ته په وینا کې نوموړي وویل چې نوي اداري واحدونه به جوړېږي، خو د دې پرېکړه باید د یوه کس یا سیاسي ګوند په خوښه نه، بلکې د خلکو د غوښتنې او د اساسي قانون او قانون له مخې وشي. هغه وویل چې د نفوس او اړتیاوو له زیاتېدو سره باید اداري جوړښت هم بدل شي، واکونه باید تر ټیټې کچې ولېږدول شي او په نظام کې اصلاحات باید د سیاسي اتفاق له لارې ترسره شي. محسن نقوي وویل چې په ۷۹ کلونو کې د تعلیم، روغتیا، پاکو اوبو، انصاف او روزګار په برخو کې خلکو ته مطلوبې پایلې نه دي ترلاسه شوې، نو ځکه د نظام ښه کول او خلکو ته د غوره اسانتیاوو برابرول اړین دي.